30 майыште Москваште Кремль полатыште Россий Президент Владимир Путин шымыт деч шукырак икшывым шот дене ончен куштышо еш-влаклан «Родительская слава» орденым да материальный полыш семын шӱдӧ тӱжем теҥге дене кучыктен. Икшыве-влакым аралыме тӱнямбал кече вашеш Москвашке кандаш ешым — элысе кажне федерал округ гыч ик еш дене — ӱжыныт. Башкортостан гыч Сайрановмыт ешлан мияш пиал шыргыжалын.

Орден дене наградитлыме татым элысе чыла гаяк телеканал ончыктыш. Сюжетлаште ты ешым ужын, шкенан калыкнан шочшыжо-влак верч меат уло чон дене йывыртышна.
Эрлашыжымак нунын дене кылым ышташ да ешышт нерген кеч изишак йодышт налаш кумыл шочо. Пеш кугу тау Мария ӱдырыштлан, возен колтымылан вигак вашештыш, ача-аваж дене мутланен налашат йӧным ыштыш. «Мыйын жапемжат чӱдырак, мӧҥгӧ пӧртылаш чемоданым погем — таче самолет дене чоҥештена. Йӧра, Мария ӱдырна — пресс-секретарь гай», — телефонышто озавате Лариса Владимировнан кумылло йӱкшым кольым. Тудо пелашыже Алексей Саляевичлан телефоным шуялтыш. Еш оза нуным Москваште кычал мумылан ялт ӧрӧ…
Бирск районысо Совой Соказан шочшыжо Алексей ден Уфаштак шочын-кушшо руш ӱдырын, Ларисан, ешым чумырымыштлан коло кум ий лиеш. Тиде ийлаште тату вате-марий кок эргылан да вич ӱдырлан илышым пӧлекленыт.
Кызыт суртоза Уфа оласе «Специализированный застройщик инвестиционно-строительный комитет» акционер ушемыште водительлан тырша, пелашыже «Универсалстройсервис» ООО-со офислаште арулыкым эскера.
Айста ынде икшывышт денат палыме лийына. 22 ияш Мария Башкир кугыжаныш медуниверситетыште, 19 ияш Владимир Уфасе кугыжаныш авиационный технический университетыште шинчымашым погат. 17 ияш Виктор — кадет, кок гана Совет Ушем Герой Муса Гареев лӱмеш тӱҥалтыш летный ямдылалтмашан общеобразовательный интернат-школышто 10-шо классыште, 13 ияш Екатерина ден 11 ияш Анастасият школышто тунемыт, а изирак ӱдыр-влакым, Натальям да Татьянам, йочасадыш кондыштарат.
Ача-авалан, икшыве-влак сай айдеме лийын кушкышт манын, чот тыршаш логалеш. Йочалан шуко жапым ойырыман, нуным чын корно дене виктарен моштыман. Сайрановмытын икшывышт талантан, спортлан шӱман лийын кушкыт. Владимирым фехтований дене Башкирийын сборныйышкыжо пуртеныт, Виктор спорт кучедалмаш да самбо дене заниматла. Нуно республикысе гына огыл, элысе таҥасымашлаштат ончыл верлам наледеныт. Екатерина бадминтон дене Башкортостанын сборный командыжын чапшым арала, Анастасия иканаште кок коллективыште кушта.
«Икшыве-влакын чыла сай, таза улыт, нунын верч тургыжланышаш уке гын, меат пиалан улына. Мый марий ялыште шочын-кушкынам, куштылго огыл илышым иленам, садлан икшывына-влакын илышышт ыҥгайлынрак вораныже, шотан айдеме лийын кушкышт манын тыршена», — ойла Алексей Саляевич.
Мутат уке, уло ешге иканаште Кремль полатыш эл вуйлыкын саламлымашке логалмымат кугу пиаллан шотлыман. Еш-влаклан Кремль мучко экскурсийым эртареныт, изирак икшыве-влаклан туштак тӱрлӧ модыш денат модаш йӧн лийын, рӱдоланамат мыняр-гынат ончал шуктеныт. Но, Алексей Саляевичын мутшо гыч, Россий Президент Владимир Путинын нуным кидым кучен саламлымыже, шкенжынат, моло ача-влак семынак, мутым каласымыже садак эше омышто ужмыла веле шарналтыт, тидлан ӱшанымылат ок чуч.
Э. Губаева. «Чолман» газет.
Фото kremlin.ru сайт гыч.