Марий Элыште кеҥеж рӱдын эртарыме кумалтышым Сӱрем маныт, а пошкырт марий-влак тиде пагытыште Кӱсӧ кумалтышым ожнысек эртарат.

11 гыч 23 июль марте Башкортостан республикын куд районжо да Нефтекамск олаште илыше марий-влак кӱсотыш лектыныт. Калтаса районышто Тошто Ящ, Васола, Павасола яллаште кумалтыш-влак лийыныт. Краснокам районышто У Пураял, Корий, Тумерсола отышто Кӱсӧ эртен. Дӧртыльӧ кундемысе Чарлакыште, Нуриман районысо Кугу Шедеште, Татышле кундемысе Башкияште, Нефтекамск олаште, Караидель районысо Крымсарайыште кумалтышым эртареныт.