Марий калыкын талешкыже Акпатыр чочойым шарныме пайрем Виче кундем Кугу Кетек ялыште 1998 ий гыч ий еда эртаралтеш. Теният тудо Российысе тӱрлӧ регион гыч марий, руш, татар-влакым ушен.

Пайремыште «Российысе марий-влакын федерал калыкле-тӱвыра автономийышт» мер ушемым вуйлатыше Лариса Яковлева лийын, Акпатыр талешкын марий тӱням вияҥдымаште надырже нерген ойлен, мероприятийын кӱлешлыкшым палемден. Тушто тыгак Виче, Татарстан да Одо кундемласе калыкле-тӱвыра автономийым вуйлатыше-влак Александр Макаров, Олег Третьяков да Анатолий Радыгин, Татарстан Республик Менделеевск районышто НКА-м вуйлатыше Геннадий Мальгин, Балтаси районышто — Валентин Максютов, Виче кундем Кикнур районышто – Алексей Кудрявцев лийыныт.
Виче кундемыште мер пашам вуйлатен шогышо-влак тыгак Полтышлан вуйым савеныт.
Кастене Кугу Кетек школ стадионышто тӱвыра да спорт мероприятий-влак лийыныт. Тушто пошкудо регионла гыч толшо спортсмен ден куштышода мурышо коллектив-влак мастарлыкыштым ончыктеныт.