Пошкырт кундемысе «Эрвел марий» Марий калыкле-тӱвыра автономийым вуйлатыше Виталий Ялаев палемден: «Благовещенск районышто да олаште марий калыклан йылмым, йӱлам, тӱвырам вияҥден колтымаште мер организацийлан верысе кучем дене официал кӱкшыт гоч пашам виктараш  куштылгырак. Тӱрлӧ проектыш ушнаш йӧн лиеш».

Верысе «Эрвел марий» марий автономийым вуйлаташ Роман Мусагитовлан ӱшаныме. Тудын алмаштышыжлан Ирина Аптыкаевам сайлыме. Тыгак палемдыме ныл направлений дене пашам виктараш куратор-влакым сайлыме. Мер ушем правленийыш чылаже 11 еҥым сайленыт. Мер ушемын офисше Благовещенск оласе Тӱвырам вияҥдыше рӱдерыште верланен.

Лишыл жапыште верысе автономий регион кӱкшытан «Эрвел марий» мер ушемыш ушна.

Палемден кодыман, 2010 ийысе Российысе перепись почеш, Благовещенск олаште 1605, районышто 3264 марий ила. Олаште 2017 ий гыч «Оҥгырйӱк» фольклор ансамбль пашам ышта.