Конкурсантке-влак «Мый марий ӱдыр улам» вашӱчаш тапырыште шкеныштын «МЫЙ»-жым почын пуат. Мӧҥгысӧ паша кышкарыште марий преданий але легенде негызеш театрализованный представленийым ямдылат. Кумшо заданий – «Этномодо» презентаций. Тушто конкурсантке-влак шке кундемысе вуйчиемышт дене палдарышаш улыт. Кажне заданийым видеош войзыман. Участнице-влаклан посна еҥ, ансамбль але родо-тукымышт полшен кертыт.

Видеоматериал могай лийшаш? Эн ончыч, конкурсын тематикыжылан келшен толшаш. Видеошто ойлымо, мурымо йӱк яндарын йоҥгышаш.

Конкурсыш пашам 22 ноябрь марте mari-centr_konkurs@mail.ru адрес дене колташ лиеш.

Вашӱчаш мероприятийым «Российысе марий-влак» Калыкле-тӱвыра федерал автономий Республикысе марий тӱвыра рӱдер ден Калык-влакын пашашт шотышто федерал агентствын полшымышт дене эртара.