31-ше шыжаште Марий самырык театрыште «Ӱдырсий» моторлык да уш-акыл конкурс эртен. Тушто 9 ӱдыр ныл номинацийыште таҥасен, марий ӱдырын кап-кыл да шӱм-чон моторлыкыштым ожнысо да кызытсе койыш-шоктышыштым чиемышт, йӱлам почын ончыктымаш, марий калыкын эртыкше да йӱлажым палымышт гоч палдареныт.

Юлсер кундем Чоткар мландын шочшыжо мотор ӱдыржӧ Татьяна Яковлева тӱрлӧ конкурсыште шке вийжым терга. Тудо чыла вере икымше лияш йӧрата, шке шонымашышкыже шуаш тырша. Марий, руш, англичан да француз йылмым сайын пала. «Мисс Грация», «Мисс Талант», «Татьяна Поволжья» лӱм-влакым Марий Эл да Россий кӱкшытыштӧ сеҥен налын.
Татьяналан «Ӱдырлан шондыкым погымаш» йӱлам ончыкташ аваже, кок шӱжарже, Кугу Корамас ялысе тӱвыра пӧртын пашаеҥже-влак полшеныт.
Виктория Мамаева – Куженер районын марий шӱшпыкшӧ. Йывансола тӱвыра пӧртын «Мурсескем», Марий кугыжаныш университын «Марий мурсем» ансамблын участницыже, Куженер районын «Марий ӱдыр – сылне ӱдыр» конкурсын сеҥышыже, Зинаида Яковлева лӱмеш премийын лауреатше, 11 Марий самырыктукым слетын участницыже.
Виктория Мамаева Йывансола тӱвыра пӧрт пеленсе фольклор ансамбль дене пырля «У вате лийме» йӱла дене палдарен.
Виктория Мочалова – Палантай лӱмеш тӱвыра да сымыктыш колледжын чолга студенткыже. Тудо изиш годсек марий тӱвырам йӧрата, садланак ончыл профессийжым тӱвыра алан денак кылден, Палантай лӱмеш тӱвыра да сымыктыш колледжын хоровой отделенийыште тунемеш. Мураш, кушташ. почеламутым возаш йӧрата, «Эрвелмарий» ансамбльыш коштеш.
Виктория да колледжыште пырля тунемме йолташыже-влак «Ӱдыр-качын сӱан муным кочмаш» йӱлам модын ончыктеныт.
Ольга Мошкина – «Марий Эл» газетын самырык журналистше. Тудо Морко район Нуръял Корамасыште шочын, Марий кугыжаныш университетым тунем пытарен, кызыт магистратурышто Юл да Виче коклаште илыше калыкын тӱвыражым шымла. Оля волонтер пашам йӧрата, кызытат мероприятий-влакым эртарымаште уло кумылын тырша. Олялан тӱҥжӧ – йӧратыме ачаже, Виталий, ӱдыржӧ дене эре кугешныже – тидын верч тудо эре тыршаш тӱҥалеш.
Конкурслан Оля йолташ ӱдыржӧ Лариса Ипулаева дене «Памаш вӱдлан волымаш» йӱлам ямдыленыт.
Розалия Осинова — Марий Турек район Арбор кундемын шочшыжо. Йошкар-Оласе медицин колледжыште дефектологлан тунемеш. Яра жапыште «Арбор вел» ансамбльышке коштеш. Тений тиде ансамбль кугу сеҥымашым — калык кокласе «Алтын майдан» фестивальын Гран-прижым конден. Тыгак Розалия спорт дене кылым куча, марий мурым мураш йӧрата.
Розалиян мӧҥгысӧ пашаже – «Вуйым пӱтырымаш» йӱла. Тудым «Арбор вел» фольклор ансамбльын участникше-влак дене пырля ончыктеныт.
Татьяна Батаева – Провой кундемын икшывыже. «Кушто шочынам, туштак кӱлеш улам», — манеш Татьяна. Ӱдыр Провой кундемыште Кужмара да Чакмарий йоча сымыктыш школлаште туныкта. Моторлыкым сӱрет гоч ончыкта, тӱрым пеш чаткан пидеш, тидлан йоча-влакымат туныкта.
Оксана Епанова – Советский районын шӱдыржӧ. Оксана калык дене ик ойыш шуаш йӧрата, садланак йолташыже шуко. Йошкар-Оласе медицин колледжыште тунемеш, «Эр ӱжара» ансамбль дене пырля тӱрлӧ конкурслаште Советский районым арала, кеҥеж пагытыште шке кундемысе Ленин лӱмеш колхозым тӱзата.
Лиана Ямнеева – Морко район Шеҥше ялын чолга ӱдыржӧ. Шенше кыдалаш школышто тунемеш, спорт дене кылым куча. Йоратыме предмет-влак коклаште марий да руш йылме. Лиана шочмо калыкын тӱвыражым вияндымашке кугу надырым пышта. Тудым шымла, эскера. Эн тӱҥжӧ марий калыкын поянлыкше дене кугешна.
Лиана да тудын йолташыже-влак «Ӱдырым луктын наҥгаймаш» йӱлам конкурсыш конденыт.
Ирина Салтыкова – Кырыкмары халыкын чевер ыдырже, Марий кугыжаныш университетын студенткыже .
Ирина «Пеледыш» ансамбльын чолга участницыже, Курыкмарий районысо Самырык-влак парламентын секретарьже. Ирина яра жапыште почеламутым воза, кочкаш шолташ да пидаш йӧрата. Курыкмарий йӱлам, калыкын эртен кодымо жапшым шымла.
«Ош патям куштымаш» — тыгай йӱлам Ирина конкурсышто ончыктен, а пеленже тудым пагалыше да йӧратыме «Ош пеледыш» ансамбльже гыч кугурак йолташыже-влак лийыныт.
Ынде сеҥыше-влак дене палдарена.
«Интернет-йӱклымаш» номинацийыште сеҥыше 31-шыжан 12 шагатлан палыме ыле. 3340 йӱк дене Куженер кундемын чолга ӱдыржӧ Виктория Мамаева сеҥен.
Кажне ӱдыр могай-гынат номинацийыште палемдалтын:
Кугу приз (гран-при) – Татьяна Яковлева;
«Пампалче» – Виктория Мамаева;
«Йӱксалче» – Ирина Салтыкова;
«Ушанче» – Ольга Мошкина;
«Семалче» – Розалия Осинова;
«Шымалче» – Виктория Мочалова;
«Кумылналше» – Татьяна Батаева;
«Тыматле» – Оксана Епанова;
«Сото вий» – Лиана Ямнеева.