«Виче мари» регион кӱкшытан калыкле-тӱвыра автономий Йошкар-Олаште илыше землякышт-влаклан Тӱнямбал ӱдырамаш пайрем кече вашеш чапле пӧлекым ыштен: 7 мартыште «Виче кундемем – шочмо-кушмо верем» концертым конден.
Тушто вич район гыч фольклор коллектив ден посна мурызо-влак шке мастарлыкыштым ончыктеныт. Пайрем мероприятий Марий Эл Республик ден Киров область коклаште тӱвыра да экономик соглашенийым илышыш пуртымо кышкарыште эртаралтын.

Ушештарена, соглашенийым 2018 ий вӱдшор тылзын Киров олаште Марий Мер Каҥашын шошымсо сессийже годым пеҥгыдемдыме. Виче кундемыште 10 районышто да Киров олаште 30000 наре марий илат, кугезе коча-коваштын йӱлажым, тӱвыражым да йылмыжым арален кодымаште шке надырыштым пыштат. Куштышо да мурышо марий коллектив-влак регионышто да Россий кӱкшытыштӧ эртыше фестиваль ден конкурслаште шке вийыштым тергат да сеҥыше радамыш логалыт.
Пайрем мероприятийым саламлымаш мут дене почмо. «Российысе марий-влак» калыкле-тӱвыра федерал автономийын Советшым вуйлатыше, Россий Президент пеленсе калык-влак коклаште кыл шотышто Советын йыжъеҥже, Марий Эл Республикын Кугыжаныш Погынжын депутатше Лариса Яковлева, ожнысо марий калыкын илыме верыште марий тӱсым да культурым аралымаште да вияҥдымаште кугу надырым пыштымылан тауштен ойлен, «Виче мари» РНКА-н вуйлатышын алмаштышыже, Марий Мер Каҥашын еҥже, Киров областьыште Марий Элын полномочный представительже Александр Макаровлан тауштыман серышым да пӧлекым кучыктен.
Марий Оньыжа Эдуард Александров Виче кундемласе фольклор коллектив-влакым Тауштымаш дене чапландарен. Тыгак Марий Эл Республикын тӱвыра, печать да калык-влакын пашашт шотышто министерствын Тауштымашыжымат коллектив-влакын вуйлатышыштлан министерствын пӧлкажым вуйлатыше Игорь Садовин кучыктен.
Малмыж район Кугу Кетек ял гыч «Шӱдыр» йоча коллектив, Кильмезь кундем гыч «Кульмуж мари» ден «Перелив», Уржум вел «Поса кундем», Пыжанью район гыч марий тӱвыра рӱдерын «Ӱдыр кас», Вятские Поляны ола гыч «Пеледыш» фольклор ансамбль да мурызо-влак Владимир Комиссаров, Елена Афанасьева, Раиса Бушуева шке усталыкыштым сцене гоч почыныт. Кажне номерым зал тич погынышо калык совым кырен вашлийын. Виче кундемеш шочын-кушшо, кызыт марий рӱдолаште илыше Анатолий Зарецких ден Александр Иванов землякышт дене пырля выступатленыт.
Концертым Виче кундем Пыжанью район Марий Ошай ялыште верланыше марий тӱвыра рӱдерын пашаеҥже Надежда Рыбакова ден марий тӱвыраште кумдан палыме Сергей Карпов вӱденыт
«Тыгай вашлиймаш-концертым кок ийлан ик гана эртараш тӱҥалына», – палемден Александр Макаров.