«Ӱдырсий» регион-влак кокласе моторлык да уш-акыл конкурсым эртарымаште «Российысе марий-влак» федерал калыкле-тӱвыра автономий шке надыржым пыштен.

Автономийын еҥже-влак конкурслан ямдылалтме пашаш ушненыт. Тыгак мер ушемын посна призше дене конкурсантке-влакым палемдыме.
Автономийын Советшым вуйлатыше, Россий Президент пеленсе калык-влак кокласе кыл шотышто комиссийын йыжъеҥже, Марий Эл Республикын Кугыжаныш Погынжын депутатше Лариса Яковлева конкурсыш ушнышо ӱдыр-влакым шокшын саламлен, калыкнан чапшым кӱшнӧ кучаш тыланен.
Лариса Николаевна посна пӧлекым Юлсер кундемын ӱдыржӧ Татьяна Яковлевалан кучыктен. «Яковлева деч Яковлевалан пӧлек», – палемден тудо да Татьяна аважлан кум ӱдырым шкетын ончен куштымыжлан тауштен ойлен, а тудлан ончыкыжымат чолга, ӱшанле лияш тыланен.
Палемдыман, Татьяна Яковлева «Ӱдырсий-2019» конкурсын тӱҥ призщым (гран-при) сеҥен налын. Таҥасымашыш ушнышо кажне ӱдыр тӱрлӧ номинацийыште палемдалтын.