11-18-ше пургыжышто Озаҥ олаште Марий тӱвыра кече-влак эртаралтыт. Тудо Марий Эл Республикым ыштымылан 100 ий теммылан пӧлеклалтеш.

Тӱвыра мероприятий 11-ше пургыжышто «Марий-влак» («Марийцы») фильмым ончымаш дене тӱҥалеш. Тудо Татарстанын Келшымаш пӧртыштӧ. (Озаҥ ола, Павлюхин ур., 57-ше пӧрт, 1-ше корп.) эрта, Татарстанын рӱдолаште илыше чыла марийым, марий калыкым, тӱвыражым да йӱлажым пагалыше еҥым ӱжеш.
12-шо пургыжышто Келшымаш пӧртыштак Марий Эл Республикысе Звенигово оласе Калык кидмастар пӧртын специалистыштын марий тӱр шотышто да шке кид дене ыштыме курчак (аралтыш-курчак) шотышто мастар классым эртарат. А кастене самырык-влакым «Поянлыкнам арален кодена» марий кас вуча.
Тӱҥ меропиятий-влак 15-ше пургыжышто эртат. Татарстан Республикын Келшымаш пӧртыштӧ ончер-влак почылтыт. Тушто архив документ-влакым, кидмастар-влакын сӧрал ыштыш-кучышыштым, йоча-влакын Марий Эллан пӧлеклыме сӱретыштым ужаш, лудаш да налаш лиеш. Тыштак марий художник-влакын ончерыштым пайремлын почыт
Варажым марий усталык коллектив-влакын да Татарстан Республик ден Марий Эл Республикын посна солистыштын «Кугезе мланде» концертышт эрта.
18-ше пургыжышто «Пӱрымаш шӱртӧ» («Нити судьбы») фильмым тӱшкан, еш дене ончаш йӧн лиеш.
В.И.Ленин лӱмеш тӱвыра да каныме комплексыште (Озаҥ ола, Копылов ур., 2А пӧрт) «Марий Эл» куштышо кугыжаныш ансамбльын юбилей программан концертше лиеш. Билетым 89877098524 тел. дене да KASSIR.RU гоч налаш лиеш.