Пагалыме туныктышо, тунемше, студент да ача-ава-влак!
Алал кумылын тендам Шинчымаш кече да у тунемме ий тӱҥалме дене саламлем!
Тиде пайрем – идалыкын ик эн волгыдо да шерге кечыже. Тудо кажне еҥын шӱмыштӧ поро шарнымашым ашна, кече гае ырыктен шога.
Икымше классыш толшо-влаклан икымше йыҥгыр шинчымаш тӱняш корным почеш, а кугурак класслаште тунемше-влаклан у тунемме идалык – ончыкылык профессийым ойырымо пагыт.
Шергакан тунемшына-влак, тек тунемме ийда тунеммаште, мер да усталык пашаште кугу лектышан, оҥай да кумылым нӧлтышӧ лиеш, сай отметке дене ача-авадам, туныктышыдам куандарен шогыза. Ӱшанем, кажне студент 2019-2020 тунемме ийыште пеҥгыде шинчымашым пога, мер илышыш чолган ушна.
Тек у тунемме ий туныктышо-влаклан профессионал кӱкшытым нӧлталаш сай негыз лиеш, тунемше ден студент-влакын таумутышт, ача-аван туныктымаште да школ пашаште полшымышт сомылдам вораҥдарат.
Пайрем дене! Чылалан пеҥгыде тазалыкым, тунеммаште да пашаште сеҥымашым, икте-весым пагалымашым тыланем.
Л.Н. Яковлева, «Российысе марий-влак» калыкле-тӱвыра федерал автономий Советым вуйлатыше