3 августышто Виче кундем Малмыж район Кетек ялыште Шнуй Акпатырлан пӧлеклалтше пайрем эртен. Марий патырлан вуйым савымашке тӱрлӧ кундемла гыч марий, татар, руш, одо калык погыненыт. Марий патырым марий калык веле огыл, моло калыкат жапла, тауштен ила.

Пайремым торжественно почмаште «Российысе марий-влак» федерал калыкле-тӱвыра автономий Совет вуйлатыше Лариса Яковлева лийын да саламлен.
Саламлымашке Татарстан республик Менделеевск муниципал район вуйлатыше, район Советым вуйлатыше Валерий Чершинцев ушнен. Тыгак пайремыште «Российысе марий-влак» федерал калыкле-тӱвыра автономий Совет вуйлатышын алмаштышыже-влак, Татарстан да Одо кундемласе калыкле-тӱвыра автономийым вуйлатыше, Мер каҥашын йыжъеҥже-влак Олег Третьяков ден Анатолий Радыгин, Виче кундемыште Марий Элын полномочный представительже, Мер каҥашын йыжъеҥже Александр Макаров пагален толыныт.
Марий Эл Республикын тӱҥ онаеҥже Александр Таныгин тӱрлӧ кундем гыч толшо онаеҥ-влак дене пырля Шнуй Акпатырын чапкӱжӧ ончылно тичмаш кинде-шинчал дене кумалтыш мутым пелештен, кажнылан тыныслыкым, перкелыкым, тазалыкым, улан илышым тыланен. Погынышо-влак кумалме лӱмеш ямлыме лемым тамленыт.
Кас велеш ялын стадионышто верысе «Кетек вел», «Шӱдыр» «Шонанпыл», «Барыня» ансамбль-влак, Татарстан Республик гыч «Агым су» гармоньчо-влакын ансамбльышт да Марий Эл гыч «Зардон» фольклор коллектив-влак кугу концертым ончыктеныт. Пайрем кастене марий мурызо-влак Лилия Петухова, Ирина Якаева, Артур Ефремов да гармоньчо Саша Иванов дене эртарыме этнодискотеке деч вара тулсавыш дене мучашлалтын.